Yws Gwynedd, Candelas a Sŵnami oedd prif enillwyr Gwobrau’r Selar a gynhaliwyd yn Aberystwyth neithiwr.
Dyma’r drydedd flwyddyn i gylchgrawn Y Selar gynnal digwyddiad i ddathlu llwyddiant cerddoriaeth Gymraeg gyfoes a heidiodd cannoedd o bobl ifanc i Aber i ddathlu a mwynhau gyda phrif artistiaid y sin.
Cipiodd cyn ganwr Frizbee, Yws Gwynedd, dair gwobr sef ‘Artist Unigol Gorau’, ‘Cân Orau’ am y trac ‘Neb ar Ôl’, a ‘Record Hir Orau am ei albwm unigol cyntaf Codi / \ Cysgu.
Er nad oedd Yws yn perfformio ar y noson o ganlyniad i enedigaeth diweddar ei blentyn cyntaf, roedd yn Aberystwyth i gasglu ei hatric o wobrau.
Gadawodd Sŵnami gyda dwy wobr – ‘Record Fer Orau’ am eu sengl ddwbl ‘Cynnydd / Gwenwyn’, a ‘Fideo Gorau’ am ‘Gwenwyn’ a gynhyrchwyd gan Storm + Shelter.
Roedd yn noson lwyddiannus hefyd i Candelas, oedd yn cloi y digwyddiad cofiadwy gyda set anhygoel, wrth iddyn nhw gipio gwobrau ‘Gwaith Celf Gorau’ ac efallai prif deitl y noson, ‘Band Gorau’.
Parti Cofiadwy
Gyda tua 700 o bobl yn dod i ymuno â’r dathlu gyda’r enillwyr, does dim amheuaeth bod Gwobrau’r Selar eleni yn ddigwyddiad cofiadwy iawn unwaith eto.
“A hithau’n drydedd flwyddyn i ni gynnal Gwobrau’r Selar fel digwyddiad byw, does dim amheuaeth ei fod wedi cydio yn nychymyg pobl, a bod yr artistiaid a’r gynulleidfa’n gweld hwn fel un o uchafbwyntiau cerddorol y flwyddyn” meddai Uwch Olygydd Y Selar, Owain Schiavone.
“Mae’r ffaith mai’r gynulleidfa sy’n dewis yr enillwyr yn y bleidlais gyhoeddus yn golygu bod ganddyn nhw berchnogaeth dros yr holl beth a dwi’n credu bod hynny’n ffactor amlwg yn llwyddiant y digwyddiad.”
Aber yn apelio
Prif noddwyr Gwobrau’r Selar eleni oedd Prifysgol Aberystwyth, ac mae’n amlwg bod lleoliad canolog y dref yn apelio at y gynulleidfa wrth i bobl deithio o bob cwr o Gymru i’r digwyddiad.
“Unwaith eto eleni roedd nifer o fysus yn llawn o bobl yn teithio i Aber, ac mae’n arwydd da iawn bod criwiau o bobl ifanc yn fodlon teithio o Ynys Môn, Caerdydd, Sir Benfro a thu hwnt er mwyn dod i ddigwyddiad fel hwn” meddai Owain Schiavone.
“Mae’n awgrymu bod y sin yn rywbeth cyffrous ar hyn o bryd, ac mae hynny’n gadarnhaol iawn ar gyfer y dyfodol.”
Rhestr lawn enillwyr Gwobrau’r Selar:
Record Fer Orau – Cynnydd / Gwenwyn – Sŵnami
Cân Orau – Neb ar Ôl – Yws Gwynedd
Gwaith Celf Gorau – Bodoli’n Ddistaw – Candelas
Hyrwyddwyr Gorau – 4 a 6
Cyflwynydd Cerddoriaeth Gorau – Lisa Gwilym
Artist Unigol Gorau – Yws Gwynedd
Digwyddiad Byw Gorau – Maes B, Eisteddfod Llanelli
Fideo Cerddoriaeth Gorau – Gwenwyn – Sŵnami
Record Hir Orau – Codi / \ Cysgu – Yws Gwynedd
Band neu Artist Newydd Gorau – Ysgol Sul
Band Gorau – Candelas
Offerynnwr Gorau – Lewis Williams (Sŵnami / Candelas)
