Rhyddhau sengl gyntaf Ilu

Bydd y band dirgel Ilu yn rhyddhau eu sengl cyntaf, ‘Graffiti Hen Ewrop’ ddiwedd mis Gorffennaf.

Ilu ydy’r band diweddaraf i ryddhau eu cynnyrch ar label hynod gynhyrchiol Recordiau Libertino, a bydd y sengl allan ar 27 Gorffennaf.

“Emynau o dorcalon a myfyrdod ar golled a galar wedi eu gwisgo yn egni ac arbrofi cerddoriaeth Gorllewin yr Almaen yn y 70au (Neu!, Can, Faust) – dyna ilu” meddai Libertino am y grŵp dirgel.

“Ond o dan hynny hefyd mae moderniaeth Ewropeaidd ac wedi ei gyplu a chyfansoddi organig mae’n plethu i symudiad Krautrock lle mae’r curiad dinesig yn gyrru y gân.”

Mae’r sengl wedi’i recordio yn Tallin, Estonia a Gorllewin Cymru, ac yn ôl y grŵp daeth y geiriau ar gyfer y gân wrth yrru yn yr eira yn Tallinn ar ddydd Nadolig – “yr awyr yn llawn tristwch a galar.”

“Ro’n i newydd golli fy nhad rai misoedd cyn symud i Tallinn ac roeddwn yn delio gyda’m galar a’m dryswch oedd yn fy llethu ar y pryd” meddai’r artist sydd heb ddatgelu pwy yn union ydyw hyd yma.

Mae’r gwaith recordio a chymysgu wedi’i wneud dan gyfarwyddwyd y cynhyrchydd Tim Lewis (Coil, Julian Cope, Spiritualized) yn ei stiwdio yn nghefn gwlad Sir Gaerfyrddin. Mastrwyd gan Iwan Morgan (Euros Childs, Gruff Rhys, Cate Le Bon, Sweet Baboo ayb).

Gadael Ymateb