Gwilym yn rhyddhau ‘Gwalia’

Mae Gwilym wedi rhyddhau’r sengl ‘Gwalia’ yn swyddogol ddydd Gwener diwethaf, 25 Hydref, ar label Recordiau Côsh.

Mae’r gân wedi’i hysbrydoli gan gytgan gofiadwy’r glasur Gymraeg, ‘O Gymru’, a gyfansoddwyd yn wreiddiol gan Rhys Jones.

Ond mae fersiwn Gwilym o ‘Gwalia’ yn gyfansoddiad newydd gan y band cyfoes sy’n cynnwys penillion modern ac alaw fachog nodweddiadol o’r band ifanc sydd yn un o grwpiau mwyaf poblogaidd Cymru.

Anthem Cwpan y Byd

Datblygwyd y syniad ar gyfer y gân yn wreiddiol ar y cyd gyda BBC Radio Cymru er mwyn llunio arwydd gân ar gyfer eu rhaglenni radio o Gwpan Rygbi’r Byd yn Siapan.

Dychwelodd Gwilym at y cynhyrchydd Rich James Roberts, a weithiodd gyda hwy ar eu halbwm cyntaf llynedd, er mwyn recordio’r gân dros ddiwrnod yn y stiwdio.

Gitarydd y grŵp , Rhys Grail, sy’n gyfrifol am waith celf y sengl – mae Rhys ar hyn o bryd yn ei flwyddyn olaf o astudio ffotograffiaeth yng Ngholeg Dinas Birmingham.

Roedd y grŵp yn teimlo fod yr amser yn briodol i ryddhau’r sengl ar ôl i Gymru guro Ffrainc wythnos diwethaf, gan sicrhau lle i’w hunain yn rownd gynderfynol Cwpan Rygbi’r Byd yn erbyn De Affrica ddydd Sul diiwethaf (27 Hydref).

Y newyddion da pellach ydy fod Gwilym ar hyn o bryd yn y broses o ysgrifennu a recordio’r caneuon ar gyfer eu hail albwm.

Prif lun: Owain Schiavone / Y Selar

Gadael Ymateb