Cynnyrch cyntaf partneriaeth Eve & Sera

Mae dwy gantores ddawnus wedi cyfuno i weithio ar brosiect newydd ar y cyd, ac mae eu sengl gyntaf allan ers dydd Gwener diwethaf, 10 Ionawr.

Y ddwy gantores dan sylw ydy Eve Goodman a Sera Zyborska, ac ar y cyd maent yn ddeuawd cerddoriaeth werin difyr. Bydd enw Sera (neu Sera Louise) yn gyfarwydd i lawer a hithau wedi bod yn rhyddhau cerddoriaeth yn y Gymraeg a Saesneg ers sawl blwyddyn bellach.

Mae enw Eve yn un llai adnabyddus o bosib, ond mae’r gantores werin ifanc yn un o artistiaid cynllun Gorwelion y BBC ar hyn o bryd ac yn dod o’r Felinheli. Mae Sera hefyd ar y cynllun hwnnw, ac mae’r ddwy’n rhan o’r label CEG.

Er hynny, dyma’r tro cyntaf i’r ddwy gyd-weithio, a ffrwyth cyntaf eu llafur ar y cyd ydy’r sengl newydd, ‘Gaeafgwsg’.

Ffydd mewn natur

Mae eu cân gyntaf yn ymwneud â rhoi eich ffydd mewn natur wrth i chi adnewyddu dros fisoedd y gaeaf.

Y newyddion da pellach ydy bod EP ar y gweill ganddynt hefyd, gyda bwriad o’i ryddhau dros gyfnod y Pasg.

Fel y sengl, mae’r EP yn gasgliad o ganeuon wedi’u hysbrydoli gan fyd natur ar ôl iddynt ddod o hyd i wyddoniadur Cymraeg ar fywyd gwyllt a chael eu swyno gan y derminoleg goll a ddefnyddiwyd yn y llyfr.

Aled Wyn Hughes sydd wedi cynhyrchu’r trac newydd, ac mae’n cynnwys cyfraniadau gan Gwilym Bowen-Rhys (Mandolin), Katherine Betteridge (Ffidil) ac Elin Hâf Taylor (Cello).

I ddathlu dyddiad rhyddhau’r sengl, roedd perfformiad ar-lein byw gan Eve & Sera ar Facebook ddydd Gwener (gweler isod), a byddant hefyd yn perfformio cyfres o gyngherddau ‘stafelloedd byw’ yn Ne Cymru rhwng 13 a 15 Chwefror.