Gŵyl Ynysu’n denu miloedd o wylwyr

Denodd yr ŵyl rithiol unigryw, Gŵyl Ynysu, filoedd o bobl i wylio’r amryw berfformiadau ddydd Sul (29 Mawrth).

Wrth i bawb ddilyn gorchmynion diweddaraf y Llywodraeth i ymbellhau’n gymdeithasol ac aros yn eu cartrefi gymaint â phosib oherwydd argyfwng COVID-19, penderfynodd Y Selar drefnu gŵyl gerddoriaeth rithiol fyddai’n dod a phawb ynghyd.

Dyma’r ŵyl gerddoriaeth Gymraeg gyntaf o’i math, gyda pherfformiadau unigol gan artistiaid Cymraeg amlwg rhwng 11:00 a hanner nos.

Roedd 13 o artistiaid yn perfformio i gyd yn ystod y dydd sef:

Y Cledrau (Joseff o’r band), Sera, Gwen Màiri, Roughion (set DJ gan Gwion), Ynys, She’s Got Spies, Jacob Elwy, Al Lewis, Elis Derby, Dienw, Dafydd Hedd, Tegid Rhys ac Ifan Pritchard o’r band Gwilym.

Undod cerddorol

Roedd pob artist yn darlledu setiau byw yn ystod y dydd trwy eu tudalen Facebook, a phob un yn cael eu rhannu ar dudalen Y Selar.

Cafodd pob set ei wylio gannoedd o weithiau, a sawl un yn denu dros fil i wylio.

Yn wir, cafodd perfformiadau artistiaid fel Gwen Màiri ac Al Lewis eu gwylio dros ddwy fil o weithiau yn ystod y dydd yn unig. Mae dal modd gwylio’r holl berfformiadau ar dudalen Facebook Y Selar.

“Gan ein bod ni i gyd yn styc yn ein cartrefi ar hyn o bryd, gan gynnwys lot o artistiaid sydd wedi gweld eu holl gigs yn cael eu gohirio am gyfnod amhenodol, roedden ni’n awyddus i ddod â phawb ynghyd a chreu rhyw fath o undod cerddorol” meddai Owain Schiavone o’r Selar.

“Rydan ni wedi bod yn trio annog artistiaid Cymraeg i rannu caneuon a setiau byw ar eu cyfryngau cymdeithasol…ac roedd cynnig y syniad o ŵyl yn rywbeth reit ffwrdd a hi i ddechrau, ond mae’n amlwg fod y syniad wedi dal y dychymyg ac roedd llwyth o artistiaid am fod yn rhan o’r prosiect.

“Dwi’n hynod o falch fod pawb wedi cael gwrandawiad arbennig o dda, a gobeithio bod y digwyddiad wedi bod yn fodd o ddangos cefnogaeth a bod yn gefn i’n gilydd mewn cyfnod anodd. Roedd cyfle i bobl wneud cyfraniad bach i bob artist am eu trafferth hefyd fel modd o ddangos gwerthfawrogiad.

“Roedd yn grêt gweld ambell un yn creu ‘partion gwylio’ wrth wylio’r digwyddiad trwy’r dydd. Pwy a ŵyr, efallai y gwelwn ni fwy o wyliau cerddorol tebyg dros y misoedd nesaf!”

Dyma holl berfformiadau’r dydd:

Y Cledrau (Jo)

Sera

Gwen Màiri

Roughion

Ynys

She’s Got Spies

Jacob Elwy

Al Lewis

Elis Derby

Dienw (Twm)

Dafydd Hedd

Bwca

Tegid Rhys

Ifan Pritchard o’r band Gwilym