Sengl Newydd Mared

Mae Mared wedi rhyddhau ei sengl ddiweddaraf ers dydd Gwener diwethaf, 19 Mehefin.

 

‘Over Again’ ydy enw’r trac newydd ac mae’n dilyn dwy sengl flaenorol ganddi sef ‘Y Reddf’ a ‘Dal ar y Teimlad’.

 

Bydd y senglau i gyd yn cael eu cynnwys ar albwm cyntaf Mared sydd i’w ryddhau gan label Recordiau I KA CHING cyn diwedd yr haf.

 

Mared ydy’r gantores Mared Williams, ddaeth i’r amlwg gyntaf fel aelod o’r grŵp o Ddyffryn Clwyd, Y Trŵbz.

Roedd y gantores o Lanefydd hefyd yn rhan o gast sioe West End ‘Les Mis’ yn y Theatr Sondheim, Llundain ddechrau’r flwyddyn eleni.

Yn ôl y label mae ‘Over Again yn gip hiraethus ar leoedd a ffrindiau o’r gorffennol, wrth geisio eu gwneud yn bresennol yn y meddwl eto.

Mae’r gân yn gosod teimladau cyfarwydd ochr yn ochr a’r profiad o dyfu a phrifio mewn lleoedd oddi cartref, a symud ymlaen mewn bywyd.

Derbyniad da

Cafodd ei senglau cyntaf dderbyniad arbennig ar raglenni Adam Walton a Bethan Elfyn ar BBC Radio Wales, yn ogystal â denu sesiynau byw a chyfweliadau ar sioeau Georgia Ruth a Huw Stephens ar BBC Radio Cymru.

Ym mis Tachwedd, gwahoddwyd Mared i berfformio gyda Cherddorfa Genedlaethol Gymreig y BBC mewn cyngerdd a ddarlledwyd yn fyw i ddathlu 50 mlynedd ers dechrau label Recordiau Sain.

Cydweithiodd Mared hefyd ar y traciau ‘Fear in the Night’ a ‘Something Real gyda’r ddeuawd electronig amlwg Denton Thrift, gan gyrraedd dros 700,000 o ffrydiau ar Spotify.

Ymhlith ei dylanwadau y mae Laura Mvula, Lucy Rose, Celeste, Madison Cunningham, Georgia Ruth, Lianne La Havas a Faye Webster.

Gadael Ymateb