Wedi i’r Eisteddfod Genedlaethol gadarnhau eu bod am fwrw ymlaen â threfniadau i gynnal yr ŵyl yn Nhregaron fis Awst nesaf, maent bellach wedi cyhoeddi bod tocynnau Maes B 2022 yn yr Eisteddfod Genedlaethol yng Ngheredigion nawr ar werth.
Yn ôl trefnwyr Maes B, maent eisoes wedi bod wrthi’n gweithio ar y lein-yp o artistiaid, bandiau a DJs ar gyfer gŵyl ffrinj y Brifwyl fis Awst.
Maent hefyd yn addo bydd Maes B 2022 yn fwy ac yn well nag erioed gyda llwyfannau newydd, ardaloedd gwahanol a llond cae o bobl yn mwynhau’r arlwy o gerddoriaeth.=
“Mae’n braf cael cyhoeddi bod tocynnau Maes B 2022 nawr ar werth ar ôl dwy flynedd o beidio gallu cynnal yr ŵyl” meddai Guto Brychan, trefnydd Maes B.
“Dyma gyfle i ni allu mwynhau rhai o enwau mwyaf y sîn gerddoriaeth yng Nghymru. Ry’n ni’n edrych ymlaen yn fawr iawn at gael croesawu cynulleidfa newydd, a’r rhai sydd wedi methu’r ŵyl, i Dregaron flwyddyn nesaf.”
Mae’r tocynnau ar werth ar wefan Maes B ers o 10:00 fore dydd Mercher diwethaf, 1 Rhagfyr.
Mae tocynnau bargen gynnar yr ŵyl bellach wedi gwerthu allan, ac felly mae’r don gyntaf o docynnau nawr ar gael, gyda dwy don arall yn dilyn a’r pris yn cynyddu rhywfaint pob tro.
Ton Gyntaf — £90
Ail Don — £100
Ton Olaf — £120
Gwefan Maes B: https://maesb.com