Gruff Rhys yn rhyddhau ‘Seeking New Gods’

Mae Gruff Rhys wedi rhyddhau ei albwm newydd, ‘Seeking New Gods’ ers dydd Gwener diwethaf, 21 Mai ar label Rough Trade Records.

Dyma seithfed albwm unigol ffryntman y Super Furry Animals, gan ddilyn ei record hir Gymraeg, ‘Pang!’ a ryddhawyd yn 2019.

Roedd Gruff eisoes wedi cynnig blas o’r albwm newydd gyda’r senglau ‘Loan Your Loanliness’ a ‘Can’t Carry On’ a ryddhawyd ym mis Mawrth ac Ebrill.

Dywed y cerddor fod yr albwm wedi dechrau fel cofiant ar gyfer y llosgfynydd Mount Paektu yn Nwyrain Asia, ond wrth iddo ddechrau ymchwilio’r hanes dechreuodd y caneuon droi’n fwy personol, gan fabwysiadu themâu mae Gruff wedi archwilio ers y gân ‘Slow Life’ gyda Super Furry Animals.

Recordiwyd yr albwm ar ymweliad byr â diffeithdir Mojave yn dilyn taith o’r Unol Daleithiau, a hefyd ym Mryste ac mae wedi’i gymysgu gan y cynhyrchydd adnabyddus Mario Caldato, sy’n enwog am ei waith gyda Beastie Boys.

Wrth ryddhau’r albwm, mae Gruff hefyd wedi cyhoeddi fideo newydd ar gyfer y trac ‘Mausoleum Of My Former Self’ sydd wedi’i gyfarwyddo gan Mark James.

 

Gadael Ymateb