Mae Tara Bandito wedi rhyddhau ei sengl ddiweddaraf ar label Recordiau Côsh.
‘Unicorn’ ydy enw’r trac diweddaraf gan Tara sydd allan ers dydd Iau diwethaf, 1 Mehefin.
Ers rhyddhau ei halbwm cyntaf ym mis Ionawr eleni, mae ‘Unicorn’ wedi datblygu’n anthem anfarwol ac yn cau setiau byw anhygoel Tara Bandito.
Rhyddhawyd y trac ar 1 Mehefin i gyd-fynd â mis balchder, ac mae ‘Unicorn’ yn gân am dderbyn chi’ch hun a chofio fod y ffordd mae eraill yn ein gweld ni’n eilradd i’r ffordd ’da ni’n teimlo am ein hunain.
Bydd rhai craff sy’n dilyn Tara ar y rhwydweithiau cymdeithasol, wedi gweld fod fideo i’r gân ar y ffordd hefyd, ac roedd modd cael cipolwg tu ôl i’r llen ar y broses o greu’r fideo ar broffil Instagram Big Love festival yn ddiweddar.
Bydd Tara’n parhau i ledu neges bwerus y gân mewn nifer o wyliau dros yr haf, gan ddechrau nos Sadwrn diwethaf yng ngŵyl Triban Eisteddfod yr Urdd yn Llanymddyfri wrth iddi gefnogi neb llai na Dafydd Iwan.
Dyma ‘Unicorn’ (RHYBYDD IAITH GREF):