Mae Canolfan S4C Yr Egin yng Nghaerfyrddin wedi lansio prosiect newydd ‘Band Byw!’, sy’n gyfres o weithdai cerddoriaeth i bobl ifanc dros yr haf eleni.
Canolfan greadigol a digidol Prifysgol Cymru y Drindod Dewi Sant ydy Yr Egin, ac mae’r gweithdai newydd yn targedu pobl ifanc blynyddoedd ysgol 10 i 13.
Er hynny, dim ond lle i ddeg o bobl sydd ar y gweithdai, ac mae’n gyfle prin i ymuno â phrosiect unigryw sy’n meithrin hyder, creadigrwydd a sgiliau cerddorol drwy brofiad ymarferol meddent.
Arweinir y gweithdai gan ddau gerddor adnabyddus sef Mari Mathias a Steffan Rhys.
Artist gwerin gyfoes ac enillydd Gwobr Gân Draddodiadol Orau yng Ngwobrau Gwerin y BBC 2023 ydy Mari Mathias, tra bod Steffan Rhys Williams yn gyfansoddwr profiadol a chynhyrchydd cerddoriaeth deledu sydd â blynyddoedd lawer o brofiad yn gweithio gyda bandiau byw ac sydd â’i stiwdios proffesiynolyn Yr Egin.
Ffyrdd amgen o gyfansoddi
Nod y prosiect ydy ysbrydoli pobl ifanc i sylweddoli bod ganddynt y gallu i greu cerddoriaeth a chaneuon gwreiddiol heb fod angen iddynt allu ysgrifennu cerddoriaeth, darllen dots, arbenigo ar offeryn neu serennu yng nghôr yr ysgol.
Byddant yn dysgu bod yna ffyrdd amgen o gyfansoddi caneuon a dyma gyfle iddynt arbrofi a deall mwy am y broses sydd yn aml yn un cydweithredol. Bwriad y prosiect yw mwynhau a magu hyder wrth greu a pherfformio.
Yn ystod y sesiynau, bydd y bobl ifanc yn cael cyfle i:
- Gyfansoddi caneuon yn gydweithredol gydag arweiniad Mari Mathias
- Arbrofi gyda band byw a jamio gydag offerynnau o dan arweiniad Steffan Rhys Williams
- Dysgu technegau perfformio, recordio a chynhyrchu sain
- Ffilmio fideo cerddoriaeth proffesiynol dan arweiniad y cyfarwyddwyr creadigol Non Lewis a Heti Hywel
- Perfformio’n fyw mewn noson arbennig i ddathlu’r gwaith terfynol yng nghlwb CWRW, Caerfyrddin
Cynhelir y sesiynau yn stiwdios proffesiynol Yr Egin, gan ddefnyddio offer sain a fideo o’r radd flaenaf.
Yn ôl Yr Egin mae hwn yn gyfle i bobl ifanc brofi’r broses greadigol lawn – o’r syniad cyntaf i’r fideo gorffenedig!
“Ar ôl dros 25 o flynyddoedd yn gweithio fel cyfansoddwr a chynhyrchydd cerddoriaeth ym myd y cyfryngau, erbyn hyn ‘dwi wrth fy modd yn rhannu’r profiad dwi wedi enyn a gweld y genhedlaeth nesaf yn llwyddo” meddai Steffan Rhys Williams.
“Fydd gweithio ar y cyd gyda Mari Mathias hefyd dwi’n meddwl yn ffantastig gan fod dull pob cyfansoddwr o gyfansoddi a chynhyrchu yn wahanol.
“Mae’r broses o gyfansoddi a llunio a chrefftio cân yn un mor amwys sy’n gwneud yr holl beth mor frawychus ond eto mor gyffrous.
“Dwi’n edrych ymlaen yn eiddgar i gael gweld beth fydd ffrwyth ein llafur ni erbyn diwedd y cwrs arbennig yma!”
Cynhelir y gweithdai yn ystod y diwrnodau canlynol:
- Llun, Gorffennaf 28
- Mawrth, Gorffennaf 29
- Llun, Awst 11
- Mawrth, Awst 12
Gellir gwneud cais am le ar y gweithdai trwy ffurflen ar-lein, a bydd y dyddiad cau ar 4
Gorffennaf, gyda’r canlyniadau’n cael eu cyhoeddi ar yr 11 Gorffennaf.