Mae rhifyn diweddaraf o zine cerddoriaeth Klust wedi’i gyhoeddi.
Dyma’r pedwerydd rhifyn o’r cylchgrawn sydd wedi datblygu dan adain gwefan ddwy-ieithog Klust sy’n trafod cerddoriaeth Gymreig.
Cyhoeddwyd y rhifyn cyntaf o’r zine atyniadol nôl ym mis Rhagfyr 2022, ac mae dau rifyn wedi ymddangos ers hynny.
Owain Elidir Williams sy’n gyfrifol am y wefan sy’n rhoi sylw i gerddoriaeth newydd o Gymru trwy gyfrwng erthyglau Cymraeg a Saesneg.
Sefydlwyd y wefan ym mis Rhagfyr 2021 ac mae wedi bod yn cyhoeddi erthyglau’n weddol reolaidd ers hynny.
“Yn cynnig gobaith, goleuni a chynhesrwydd, mae pedwerydd rhifyn o Gylchgrawn Klust allan rŵan. Diolch i bawb am fod yn rhan” meddai Klust.
Mae’r rhifyn newydd yn cynnwys gweithiau gwreiddiol, ffotograffiaeth unigryw a chyfweliadau arbennig, ac yn ymestyn dros 124 o dudalennau.
Ymysg yr artistiaid sy’n ymddangos yn y rhifyn diweddaraf mae Sywel Nyw, Lleucu Non, Cyn Cwsg, Gwenno Morgan, Tokomololo, Siula a mwy.
Mae modd archebu’r rhifyn newydd ar wefan Klust.