Bydd prosiect electronig y cerddorion Cian Ciarán, Kev Tame a Llyr Evans, yn ail-ryddhau ei halbwm o 2006 yn yr hydref eleni.
Dau ddegawd ers ei ryddhau yn wreiddiol, i’r rheini sydd am gwblhau eu casgliad bydd unig albwm Acid Casuals, ‘Omni’, ar gael o’r diwedd ar finyl.
Bydd yn cael ei ail-gyhoeddi ar ddydd Gwener 30 Hydref wedi’i ail-feistroli gan Circuitry Electronic.
Gan ddychwelyd nid yn unig ar LP glas ar gyfer awdiogarwyr, ond hefyd ar CD a fformatau digidol, mae ail-ryddhau’n dod â record unigryw yn ôl yn fyw, o’r un bwrlwm ffrwythlon a gynhyrchodd y Super Furry Animals ac sydd wedi ei hen adnabod fel pennod hanfodol o lên gwerin cerddoriaeth Gymraeg er o bosibl nad yw’n cael ei ddathlu’n ddigonol.
Mae’r ailgyhoeddiad, gyda gwaith celf newydd gan Ian Anderson o The Designers Republic (Warp, Aphex, LFO), hefyd yn cyrraedd ochr yn ochr â chyfle prin i glywed y record yn fyw, wedi i Acid Casuals ymwrthod a’i berfformio ar lwyfan y tro cyntaf.
Bydd teulu estynedig Acid Casuals, gan gynnwys Kris Jenkins ar offerynnau taro, Rhys Edwards ar synths, ynghyd â phiano sy’n chwarae ei hun, yn ymuno â Cian Ciarán a Kev Tame ar gyfer perfformiad arbennig, o ‘Omni’ yng Nghaerdydd fel rhan o Ŵyl Ddinas Gerdd Caerdydd. Mae’r sioe ar ddydd Gwener 2 Hydref 2026 yng Ngholeg Brenhinol Cerdd a Drama Cymru yn nodi’r tro cyntaf i’r albwm gael ei pherfformio yn ei gyfanrwydd.
Nid band confensiynol
Ganwyd Acid Casuals yng Nghaerdydd ym 1994 ac mae’n parhau i fod yn gymuned rydd o gerddorion, artistiaid a ffrindiau, gyda dewin synths y Furries, Ciarán, cyn basydd Big Leaves, Tame a’r cerddor ac actor, Llyr Evans yn aelodau craidd.
Doedd Acid Casuals erioed wedi’i greu fel band confensiynol – roedd perfformwyr canolog y grŵp ynghyd ag aelodau achlysurol yn ymuno fel y gallent pan oedd amser yn caniatáu. Gyda threigl amser, syniadau’n cronni, teithiau ac albyms yn mynd a dod, roedd hunaniaeth Acid Casuals yn parhau i fod yn fwriadol hyblyg.
Er bod Evans, sy’n fwyaf adnabyddus am ymddangos ochr yn ochr â Rhys Ifans yn y ffilm Twin Town, wedi gwneud cyfraniad cerddorol anfesuradwy, ef hefyd oedd wyneb cyhoeddus y prosiect. Yn hanfodol, ar adeg pan oedd swildod cyhoeddusrwydd ac ymrwymiadau cerddorol eraill yn gorfodi aelodau eraill i fod yn anhysbys, camodd i lygad y camera.
Wedi’i ryddhau yn 2006, llenwodd ‘Omni’ y gofod chwilfrydig rhwng albyms Super Furry Animals, ‘Love Kraft’ a ‘Hey Venus!’ a daeth i fod yn arwyddocaol, ymhlith ei wrandawyr gwybodus, o’r ‘run agwedd gerddorol anturus.
Mae ei ddeg trac yn symud yn rhydd rhwng electronig haniaethol, alawon amgylchynol, pop chwithig, arbrofi lleisiol a’r math o gân seicadelig a oedd wedi dod yn ail natur ond wedi ei ddatblygu ymhellach.
Yn fwy arwyddocaol na’i gysylltiad ag un o’r bandiau Cymreig gorau erioed, mae ‘Omni’ yn albwm a elwodd o’i ymagwedd feirniadol, cwbl gadarnhaol ei hun. Ar ôl ei ryddhau ar ddydd Llun 30 Ionawr 2006, a’i chware mewn parti gwrando am y tro cyntaf yn Planetariwm Caerdydd, canmolodd The Times y record fel un “amrywiol a diddorol“, tra bod Pitchfork wedi mynd ymhellach, gan ddisgrifio cynnyrch Ciarán a Tame fel gwaith a allai sefyll fel “uchafbwynt gyrfa i lawer o’u cyfoedion.”
Dogfen o gymuned greadigol
Mae amrywiaeth syniadau’r record yn amlwg yn nheitlau rhyfedd a chofiadwy’r traciau : o ‘If I’m A Selt’, ‘You’re A Sunt’, sy’n ddyledus i Richard Burton, a ‘132a Column Road’ trwy Wa Da Da’, ‘Kraken’ a ‘Luciano’, i ramant doo-wop breuddwydiol y trac cloi, ‘Bowl Me Over’.
Daeth Acid Casuals a’r albwm at ei gilydd rhwng gwahanol deithiau band a sesiynau stiwdio gyda Ciarán yn cynhyrchu synau a syniadau yn barhaus.
“Recordio ‘Omni’ oedd y tro cyntaf i ni dreulio mwy nag ychydig ddyddiau yn y stiwdio ar record Acid Casuals” meddai Kev Tame.
“Roedd Cian bob amser yn sgwennu ac yn dod o hyd i syniadau a synau anhygoel, felly roedd gennym yr holl bethau hyn i weithio gyda nhw a’u tynnu at ei gilydd rhwng gwahanol deithiau band.
“Roedd yn bleser hwyliog i weithio ar yr albwm ac fe oedd yn donic perffaith i mi ar y pryd, gan fy mod newydd golli fy nhad – llafur cariad go iawn o record – nid oedd gan yr un ohonom unrhyw uchelgais iddo y tu hwnt i’w gael allan yna.”
I’r rhai a oedd yno, mae’n ddogfen fywiog o gymuned greadigol ehangach a oedd yn bodoli yng Nghaerdydd yng nghanol y 2000au, nad oedd erioed yn hawdd ei chyfyngu gan enwau bandiau na gyrfaoedd confensiynol. I wrandawyr sy’n cymryd eu camau cyntaf chwilfrydig o’r Furries i Acid Casuals, neu i’r rhai sydd am gwblhau eu casgliadau finyl, mae darn hir-ddisgwyliedig o’r jig-so ar fin syrthio i’w le.
Dyma drac ‘Y Ferch ar y Cei yn Rio’ o’r albwm:
Llun:Rhodri Meilir