Artist sy’n gyfarwydd am ei chaneuon Nadolig ydy Angharad Rhiannon, ac mae ganddi gynnig arall ar gyfer 2024.
‘Yn yr Eira’ ydy enw’r sengl Nadoligaidd ddiweddaraf gan y ferch o Rondda Cynon Tâf, ac mae’n dilyn y caneuon Nadolig blaenorol ganddi, sef ‘Mae Santa ar ei Ffordd’ a ryddhawyd yn 2021 ac ‘Un Nadolig’ yn 2023.
Does dim ystyr cudd i’r gân hon yn ôl Angharad – mae’n gân am adeiladu, chwarae a joio yn yr eira. Rhywbeth mae Angharad wrth ei bodd yn gwneud o hyd.
“Pan o’n i’n blentyn, doedd na ddim byd gwell na diwrnod eira go iawn lle chi’n cael lapio’n gynnes i fynd mas i chwarae” meddai Angharad.
“Roedd cyffro diwrnod eira fel dim byd arall. Os oedd yr ysgol yn cau oherwydd eira, roedd hi fel parti mawr! Dyna dwi’n trio cyfleu yn y gân hon. Y cyffro, y diniweidrwydd, y llawenydd.”
Mae Angharad wedi mwynhau blwyddyn gyffrous arall yn gerddorol. Rhai uchafbwyntiau oedd perfformio gyda Bronwen Lewis eto, rhyddhau EP o ganeuon am ei hardal leol, perfformio yn yr Eisteddfod ym Mhontypridd, bod yn rhan o albwm feinyl Y Selar, a rhyddhau’r gân ‘Laru’ sydd dal i fod yn ffefryn mewn gigs.