Mae trefnwyr Gŵyl Fel ‘na Mai yn Sir Benfro wedi cyhoeddi manylion arlwy’r digwyddiad ar gyfer 2026.
Crymych ydy lleoliad yr ŵyl ifanc yma, sydd yn un o wyliau cyntaf yr haf ac fe’i cynhelir ar 2 Mai yn 2026.
Mae’r Gŵyl Fel ‘Na Mai yn dathlu pen-blwydd yn bump oed yn 2026, ac wedi cyhoeddi’r arlwy yn gynnar.
Un o’r prif enwau sy’n perfformio y tro hwn ydy Eden, a bydd Bwncath yn enw arall sy’n dal sylw llawer.
Ynghyd â’r prif artistiaid hynny bydd Ynys, Ar Log, Lowri Evans, Dros Dro, Aeron Pughe a Dewin i gyd i’w gweld ar y llwyfan.
Mae’r trefnwyr wedi cyhoeddi manylion sesiwn Canu Oci am y tro cyntaf, a hynny i gyfeiliant Dafydd Pantrod a’r band – bydd y sesiwn yn gyfle i bawb godi canu a chodi hwyl meddent.
Bydd yr ŵyl hefyd, yn ôl yr arfer, yn cynnig llwyfan i dalentau newydd gyda pherfformiadau gan Enillwyr Gwobrau Coffa Ail Symudiad, sef y gystadleuaeth flynyddol sy’n coroni band ac artist unigol gorau.
“Rydyn ni’n hynod falch o gyrraedd ein pumed pen-blwydd” meddai’r trefnwyr.
“Mae’r ŵyl wedi datblygu a thyfu bob blwyddyn, diolch i’n cynulleidfa ffyddlon, y gwirfoddolwyr gweithgar a chefnogaeth barhaus y gymuned.
“Mae’r lein-yp eleni’n dathlu’r daith ac ry’ ni’n parhau i gynnig arlwy amrywiol o gerddoriaeth draddodiadaol a chyfoes Gymraeg sydd yn apelio at ystod eang o oed.”
Mae tocynnau cynnar y digwyddiad ar werth i aelodau Clwb Fel ‘Na Mai yn unig, ers dydd Llun 1 Rhagfyr ac mae gweddill y tocynnau wedi eu rhyddhau i’r cyhoedd erbyn hyn hefyd.