Mae’r Eisteddfod Genedlaethol wedi cyhoeddi manylion llwyfan ‘Hwyrnos’, sef y maes gwersylla 21+ newydd fydd yn ran o arlwy Maes B yn yr Eisteddfod eleni.
Cyhoeddwyd manylion y maes gwersylla newydd beth amser nôl a bellach mae’r trefnwyr wedi datgelu y bydd llwyfan perfformio i gyd-fynd â’r ardal newydd.
Yn ôl yr Eisteddfod bydd Llwyfan Hwyrnos yn cynnig cyfle i brofi’r gorau o gerddoriaeth newydd Cymru tan oriau mân y bore.
Yn agor arlwy’r llwyfan newydd bydd Mared a’i llais trydanol ar y Nos Fercher.
Bydd Pys Melyn a’u roc melys yn siŵr o hudo’r dorf fel prif artist ar y Nos Iau.
Yn cloi’r Nos Wener bydd y pedwarawd indi poblogaidd Mellt yn dilyn eu taith gyffrous i ŵyl SXSW yn Texas, cyn i Morgan Elwy ac Aleighcia Scott ddod at ei gilydd i berfformio set arbennig ar y Nos Sadwrn.
Leinyp llawn Llwyfan Hwyrnos:
Nos Fercher 6 Awst – Mared, Wrkhouse, Lleucu Non
Nos Iau 7 Awst – Pys Melyn, Cyn Cwsg, Tai Haf Heb Driogolyn
Nos Wener 8 Awst – Mellt, Sywel Nyw, Emyr Sion
Nos Sadwrn 9 Awst – Morgan Elwy ac Aleighcia Scott, Griff Lynch, Enillydd Brwydr y Bandiau
