Mae’r Eisteddfod Genedlaethol wedi cyhoeddi manylion yr artistiaid fydd yn perfformio ar lwyfan Maes pan fydd y Brifwyl yn ymweld a Llantood ger Aberteifi ym mis Awst eleni.
Ymhlith rhai o brif artistiaid Maes B, Eisteddfod Genedlaethol Y Garreg Las mae Eden, Bwncath, Pys Melyn, Breichiau Hir a mwy.
Cynhelir Maes B rhwng 4–8 Awst fel rhan o’r Eisteddfod Genedlaethol.
Yn dilyn llwyddiant datblygiadau newydd ym Maes B Wrecsam 2025 dywed y trefnwyr eu bod yn falch o gyhoeddi’r cip cyntaf ar arlwy eleni, gyda mwy o gyhoeddiadau i ddod dros yr wythnosau nesaf, gan gynnwys llwyfannau a phrofiadau newydd.
Yn ogystal ag enwau mawr fel Candelas, sy’n paratoi i ryddhau albwm newydd, ac Eden, fydd yn gwneud un o’i unig berfformiadau eleni ym Maes B, bydd yr ŵyl hefyd yn croesawu nifer o artistiaid sy’n ymddangos yno am y tro cyntaf.
Ymhlith y rhain mae Lafant, Martha Elen, Betsan, Yr Hunanol, Tokomololo a mwy.
Ar ôl i’r don gyntaf o docynnau bargen gynnar werthu bron yn syth, mae tocynnau cyfnod yn prysur ddiflannu.
Mae manylion prisiau llawn ar gael ar wefan Maes B, gyda thocynnau ar gyfer nosweithiau a gigs unigol i’w cyhoeddi ar gyfryngau cymdeithasol yr ŵyl dros yr wythnosau nesaf.