‘Lonely’ ydy enw’r sengl ddiwddaraf gan Malan sydd allan ar label Côsh ers dydd Gwener 17 Hydref.
Cafodd fersiwn byw o’r gân yma ei rhyddhau ym mis Ionawr, fel rhan o albwm aml-gyfrannog ‘Stafell Sbâr Sain: Klust’.
Yn wreiddiol, y bwriad oedd i adael honno fel yr unig fersiwn o’r gân oedd yn bodoli – ond gyda pherswâd y rhai ddisgynnodd mewn cariad gyda’r trac, dyma ryddhau fersiwn stiwdio lawn.
Mae Malan yn paratoi i ryddhau EP dwyieithog ym mis Tachwedd i ddathlu’r ffaith ei bod hi’n mynd allan i ŵyl ‘M for Montreal’ yng Nghanada i gynrychioli Cymru, gan rannu llwyfan gyda Gruff Rhys.
Gyda ‘Lonely’, mae Malan yn cyflawni camp brin; sef y gallu i greu cân sy’n swnio’n hollol gyfarwydd ac yn hollol ffres ar yr un pryd. Yn ei steil hamddenol, jazz nodweddiadol, mae ‘Lonely’ yn siŵr o ddenu mwy o glod i’r gantores ifanc o Gaernarfon.