Mae rhifyn newydd sbon o gylchgrawn cerddoriaeth Gymraeg gyfoes Y Selar wedi’i gyhoeddi mewn pryd i’r Eisteddfod Genedlaethol yn Wrecsam.
Yn ôl yr arfer mae’r cylchgrawn yn cynnwys pob math o erthyglau am gerddoriaeth Gymraeg.
Yr artist ifanc dalentog o Frynrefail, Buddug, sydd ar glawr y rhifyn newydd ac mae cyfweliad gyda hi yn y rhifyn dan ofal Elain Roberts.
Ceir cyfweliad hefyd gyda Cordia gan Elen Morlais a Cyn Cwsg gan Angharad Rhiannon.
Mae Gruffudd ab Owain yn rhoi sylw i fandiau sydd wedi atgyfodi yn y rhifyn – yn benodol felly Diffiniad, Crys, Gwibdaith Hen Frân ac Anweledig.
Bu Lois Gwenllian yn holi Ynyr Roberts am ei brosiect pop, Popeth, ar gyfer y rhifyn hwn, ac mae Elain Gwynedd hefyd wedi bod yn sgwrsio gydag Elis Derby am y band Ciwb a’u halbwm newydd.
Y nofel ‘Tempo’ gan Rhianedd Jewell sy’n cael sylw eitem ‘Trac Sain Dy Nofel’ ac mae eitem ‘Geiriau’r Gân’ yn canolbwyntio ar y trac ‘Y Newid’ gan Mynadd.
Bydd copïau o’r Selar ar gael yn rhad ac am ddim ar faes yr Eisteddfod Genedlaethol yn Wrecsam, ynghyd ag yn y mannau arferol eraill. Bydd fersiwn digidol y cylchgrawn hefyd ar gael ar wefan Y Selar.
Cliciwch y clawr isod i ddarllen y fersiwn digidol
