Mae Al Lewis wedi wedi rhyddhau ei sengl newydd ers dydd Gwener diwethaf, 11 Ebrill.
‘Train Song’ ydy enw’r trac diweddaraf gan y cerddor poblogaidd, ac mae’n enw priodol iawn o ystyried y gyfres o gigs mae ar fin dechrau arni.
Dehongliad Al yw hi o gân gan yr artist gwerin chwedlonol, Vashti Bunyan a ddaeth allan fel sengl yn wreiddiol yn 1966.
Yn ymddangos ar y trac yn ogystal ag Al ei hun, mae’r delynores fyd-enwog, Catrin Finch a’r cerddor amryddawn, Patrick Rimes (ffidil a harmoniwm) gyda chefnogaeth gan CJ Jones ar y dryms ac Iestyn Jones ar y bas dwbl.
Mae’r sengl yn rhagflas o’r hyn ellir ei ddisgwyl ar daith unigryw Al, mewn partneriaeth â Thrafnidiaeth Cymru, wrth iddo ymweld â threfi a dinasoedd ar hyd rhwydwaith rheilffyrdd godidog Cymru ym mis Mai.
Gyda 2025 yn dynodi 200 mlynedd ers sefydlu’r rheilffordd fodern, bydd Al nid yn unig yn ymweld â rhannau newydd o’r wlad, ond hefyd yn gwneud defnydd o ddull mwy amgylcheddol a chymdeithasol o deithio, gan ddangos sut y gall cerddorion wneud eu rhan i leihau ôl troed carbon.
Bydd Al yn dod â’i gyfuniad o gerddoriaeth Gymraeg a Saesneg i leoliadau cyfareddol fel y Neuadd Ercwlff ym Mhortmeirion ac Eglwys syfrdanol Sant Tudno ar ben y Gogarth yn Llandudno.
Mae’r daith yn dilyn cyfres hynod lwyddiannus o sioeau gan Al dros gyfnod y Nadolig lle gwerthwyd pob tocyn ar gyfer lleoliadau ledled Cymru o’r Galeri yng Nghaernarfon i ddwy noson yn Eglwys Sant Ioan, Caerdydd.
Cafodd albwm diweddaraf Al, ‘Fifteen Years’, ganmoliaeth eang ar draws y BBC a gorsafoedd a chyhoeddiadau ledled Ewrop a’r Unol Daleithiau lle edrychodd ar themâu o alar ac iachâd drwy ei brofiad ei hun o ddechrau ymdopi â cholli ei dad wrth obeithio helpu eraill mewn sefyllfaoedd tebyg.
Taith Trenau Al Lewis Train Tour
26.04.25 – Theatr Soar, Merthyr Tydfil
01.05.25 – Bryn Williams @ Porth Eirias
02.05.25 – Eglwys St Tudno, Llandudno
03.05.25 – Canolfan Ucheldre, Caergybi
08.05.25 – Clwb y Bont, Pontypridd
09.05.25 – Saith Seren, Wrecsam (rhan oFOCUS Wales)
10.05.25 – Portmeirion, Gwynedd
15.05.25 – Oriel Mission, Abertawe
16.05.25 – Eglwys St Augustine, Penarth
17.05.25 – Institute, Llanfair Caereinion
22.05.25 – Peppers, Abergwaun
23.05.25 – CWRW, Caerfyrddin
24.05.25 – Amgueddfa Dinbych-y-Pysgod a The Big Retreat Festival Lawrenny
29.05.25 – Wynnstay, Machynlleth
30.05.25 – The Art Shop & Chapel, Y Fenni